لالہ و گل کی نہ یہ باد صبا کی بات ہے

لالہ و گل کی نہ یہ باد صبا کی بات ہے

خون دل کا ذکر ہے رنگ حنا کی بات ہے

یہ جو دیوانوں کے لب پر دل ربا کی بات ہے

اس کو کیا سمجھے گی دنیا یہ وفا کی بات ہے

میرے مالک تیری دنیا میں یہ کیا ہونے لگا

ہر طرف ظلم و ستم جور و جفا کی بات ہے

کیوں نہ اب تقدیر چمکے رہروان شوق کی

جس طرف دیکھو انہیں کے نقش پا کی بات ہے

میری دنیا لوٹ لی جس بے وفا نے دوستو

کیا کروں لب پر اسی کافر ادا کی بات ہے

جس نے اپنے ساز ہستی پر سنائی تھی غزل

ان کی محفل میں اسی نغمہ سرا کی بات ہے

چشم ساقی کا اشارہ پا کے توبہ توڑ دی

یہ تو کشفیؔ آپ جیسے با وفا کی بات ہے