اک نگاہِ جاں ستاں نے کر دیا بسمل مجھے

اک نگاہِ جاں ستاں نے کر دیا بسمل مجھے

مرنے جینے کا مزہ سب ہو گیا حاصل مجھے

ہر قدم پر مل رہی ہے راحتِ منزل مجھے

جا رہا ہوں جس طرف لے جا رہا ہے دل مجھے

دم تو لینے دے ذرا اے اضطرابِ دل مجھے

سانس لینا بھی ہے اب تیرے سبب مشکل مجھے

اس کی چشمِ لطف ہو جائے تو بیڑا پار ہے

موج ہو کشتی مجھے گرداب ہو ساحل مجھے

درد مندانِ محبت ہی سمجھتے ہیں اسے

جس طرح تڑپا رہا ہے اضطراب دل مجھے

بیخودی عشق و الفت رہنمائے شوق ہے

کیا خبر ہے کس طرف لے جا رہا ہے دل مجھے