ٹھکراتے ہیں وہ سر جو مرا کبر و ناز سے

ٹھکراتے ہیں وہ سر جو مرا کبر و ناز سے

سجدے قدم پہ کرتے ہیں عجز و نیاز سے

ہم کو کھلا یہ بھید بڑے پاک باز سے

ملتی ہے شاہراہ حقیقت مجاز سے

فرہاد و قیس نا بلد راہ عشق تھے

واقف ہمیں ہیں اس کے نشیب و فراز سے

قصہ شب فراق کا بے انتہا ہے طول

ملتا ہے سلسلہ تری زلف دراز سے

اے ترک تیغ و تیر کی کیا احتیاج ہے

مجھ کو شہید کیجیے شمشیر ناز سے

زاہد حضور قلب سے جب تک ادا نہ ہو

بتلا تو کیا ثواب پھر ایسی نماز سے

عالیؔ جو وصف لکھتے ہیں اس رشک گل کے ہم

جھڑتے ہیں پھول خامہ مدحت طراز سے