یہ کیا کیا کہ وقت کے محور سے کٹ گیا

یہ کیا کیا کہ وقت کے محور سے کٹ گیا

یعنی انا کی ضد میں بھرے گھر سے کٹ گیا

اس کے نصیب میں ہے کہاں خوشبوئے ارم

جو کربلا میں سبط پیمبرؐ سے کٹ گیا

تیغ و سنان سے نہیں سنئے جناب جی

اپنا گلا تو پیار کے خنجر سے کٹ گیا

منزل اسے ملے گی بھلا کس طرح سنو

جو درمیان راہ میں رہبرؔ سے کٹ گیا

میں تو شکار ان کی نگہ ناز کا ہوا

یہ کس نے کہہ دیا کہ میں خنجر سے کٹ گیا

رہبرؔ بتا کہ کون سی آخری گھڑی تھی وہ

جب میرا ہاتھ ایک گل تر سے کٹ گیا