آگیا پیغامِ دلبر عاشقِ مضطر کے پاس

آگیا پیغامِ دلبر عاشقِ مضطر کے پاس

نکہتِ یوسف گئی یعقوب پیغمبر کے پاس

رندؔ پہنچایا کسی نے بھی نہ اس دلبر کے پاس

لے گیا یہ التجا میں بیشتر اکثر کے پاس

عشق ِابرو میں کیا مرنے میں کب میں نے قصور

بارہا قاتل گلا رکھ رکھ دیا خنجر کے پاس

منہ ملا کر منہ سے بھی محروم بوسے سے رہے

ہم پھرے تشنہ پہنچ کر چشمۂ کوثر کے پاس

حسن کے طالب غنی ہوں دولتِ دیدار سے

سیم تن محبوب آویں عاشقِ بے زر کے پاس

دل تو آگے دے چکا ہوں یہ بھی اک دن نذر ہے

کیا کروں گا رکھ کے جان ِزار بے دلبر کے پاس

لطف اٹھایا ہے جو عشقِ بت میں دل کی چوٹ کا

گرتے ہیں دانستہ ٹھوکر کھا کے ہم پتھر کے پاس

کارواں درکارواں دیکھا متاع ِحسن کو

جنس ِکنعان پر نہ نکلی ایک سوداگر کے پاس

اے جنوں تیرے ذریعہ سے رسائی ہوگئی

غیر ممکن تھا پہنچنا اس پری پیکر کے پاس

نور اس کا بھی ہو زائل وہ سیہ طالع ہوں میں

ہو زحل گر آفتاب آوے مرے اختر کے پاس

دیکھ لعبت باز گردوں سے نہ کھانا تو فریب

ہیں ہزاروں شعبدے اس پیربازی گر کے پاس

ثالث ِبالخیر ہے ہو عاشق و معشوق میں

وحی بے جبریل کب آتی ہے پیغمبر کے پاس

مثل ِیعقوب اپنے یوسف کو جو رویا ہجر میں

پڑ گئے رخسار پر ناسور چشم ِتر کے پاس

اتصال ِقلب ہے گو ہے بظاہر فاصلہ

دور دل سے تو نہیں وہ گھر نہیں گو گھر کے پاس

جب تلک جیتا ہوں مثل سایہ تیرے ساتھ ہوں

صورتِ ہمزاد اے قاتل رہوں گا مر کے پاس

کیا زوالِ حسن نے عالم کیا کیوں مہرباں

تم بلاتے ہو کوئی آتا نہیں ہے در کےپاس

وہ لگے اب دور کھنچنے کیا خدا کی شان ہے

آ نہ پاتے تھے جو آکے منتیں کر کر کے پاس

درد سر الفت کا بعد از مرگ بھی ہوگا ضرور

گور میں رکھ دیجیو صندل رگڑ کر سر کے پاس

ہچکیاں لے لے کے دو دن دم اکھڑ جائے مرا

ساقیا دیکھوں جو شیشہ یار بن ساغر کے پاس

شومیِ طالع سے میرے خشک ہوجاتاتھا شیر

عہدِ طفلی میں اگر جاتا تھا میں مادر کے پاس

شق ہوا جاتا ہے سینہ دھیان جب آتا ہے رندؔ

آج اکیلے بیٹھے ہیں کل لیٹے تھے دلبر کے پاس