ستم کیا کیا شبِ فرقت میں تونے مجھ پہ توڑا ہے

ستم کیا کیا شبِ فرقت میں تونے مجھ پہ توڑا ہے

سزا ہے تیری او دل تجھ پہ جو کچھ ہو سو تھوڑا ہے

شکستِ جام کا بہتان ہم رندوں پہ جوڑا ہے

بھلا ساقی کسی نے بھی قدح کو اپنے توڑا ہے

اڑا یوں دھجیاں کرکے نہ تو میرے گریباں کو

جنوں کن دقتوں سے میں نے اک اک تار جوڑا ہے

یہ ساری رات ٹیسا ہے نہیں سونے دیا دم بھر

الٰہی دل ہے پہلو میں مرے یا کوئی پھوڑا ہے

الٰہی الاماں رہیو نگہباں اپنے بندوں کا

بلا نازل ہوئی شانے پہ کاکل اس نے چھوڑا ہے

پھنسائیں بلبلیں گن گن کے توڑےپھول چن چن کے

چمن میں تم نے او صیاد و گل چیں کچھ بھی چھوڑا ہے

جو وہ روٹھے ہیں تو کس کس خوشامد سے منایا ہے

کبھی پاؤں پڑے ہیں ہم کبھی ہاتھوں کو جوڑا ہے

ترا اور رند کا انصاف ہوگا اب قیامت کو

سمجھ لےگا وہی تجھ سے خدا پر اس نے چھوڑا ہے