پھینک دوں گا میں اسے چیر کے پہلو اپنا

پھینک دوں گا میں اسے چیر کے پہلو اپنا

تجھ پہ قابو نہیں دل پر تو ہے قابو اپنا

بوئے گل سے مجھے دھوکا نہ دے اس کی بو کا

چوچلا رہنے دے باد سحری تو اپنا

رام کس طرح کرے گا کوئی صیاد اسے

اپنے سائے سے بھی رم کرتا ہے آہو اپنا

قصد نخچیر تو کر تیغ تو تو کھینچ اے ترک

آپ کاٹے گا گلا آن کے آہو اپنا

یاد کر کے لب پان خوردہ کی تیرے سرخی

خون دل اپنا پیا ہے کئی چلو اپنا

تا سحر ہجر کی شب ورد کیا کرتا ہے

دل کبھی سینہ کبھی اور کبھی پہلو اپنا

مشترک شب سے ہوا خون جگر اشکوں میں

رات سے رنگ بدلنے لگے آنسو اپنا

پشت پا ماریں نہ کیوں ہمت گردوں پر رندؔ

شل نہیں فضل خدا سے ابھی بازو اپنا