اتنا بھی نہ شرماؤ پہلے کی طرح پھر سے

اتنا بھی نہ شرماؤ پہلے کی طرح پھر سے

اپنے ہیں یہ اپناؤ پہلے کی طرح پھر سے

جس در سے بنا مانگتے ملتا ہے تمہیں سب کچھ

یہ ہاتھ نہ پھیلاؤ پہلے کی طرح پھر سے

یہ در بھی تمہارا ہے یہ گھر بھی تمہارا ہے

جب آنا ہے آ جاؤ پہلے کی طرح پھر سے

بیمار محبت کو دل دار کی حاجت ہے

صورت کو دکھا جاؤ پہلے کی طرح پھر سے

مرکز سے ہٹے ہم تو بربادیاں لازم ہیں

محبوب کے گن گاؤ پہلے کی طرح پھر سے

سنتے ہیں پریشانی تنہائی بڑھاتی ہے

محفل میں چلے آؤ پہلے کی طرح پھر سے

عالمؔ کو اجالوں سے منت کی ضرورت کیا

پردے سے نکل آؤ پہلے کی طرح پھر سے