زمین مے کدہ عرش بریں معلوم ہوتی ہے

زمین مے کدہ عرش بریں معلوم ہوتی ہے

یہ خشت خم فرشتے کی جبیں معلوم ہوتی ہے

مری حسرت تبسم آفریں معلوم ہوتی ہے

چھپی ترے تبسم میں نہیں معلوم ہوتی ہے

یہ اے صیاد رہ رہ کر چمکتی ہے کہاں بجلی

جہاں مرا نشیمن تھا وہیں معلوم ہوتی ہے

چلی بھی تیغ تو کس ناز سے تھم تھم کے رک رک کر

یہ کچھ ان سے زیادہ نازنیں معلوم ہوتی ہے

نگاہ تیز بھی پردے میں ہے مژگاں درازی کے

چھری بھی آج زیر آستیں معلوم ہوتی ہے

لپک اس کی چمک وہی دم خم وہی عالم

یہ بجلی کوئی آہ آتشیں معلوم ہوتی ہے

ریاضؔ ایسی مرے دل سے لگی ہے جام کوثر کی

مئے انگور اب اچھی نہیں معلوم ہوتی ہے