نماز بھی وہیں پڑھتے ہیں وہیں وضو کرتے

نماز بھی وہیں پڑھتے ہیں وہیں وضو کرتے

شکار بھی بط مے کے کنارے جو کرتے

کلیم بات بڑھاتے نہ گفتگو کرتے

لب خاموش سے اظہار آرزو کرتے

حسین بھی ہوں خوش آواز بھی فرشتۂ قبر

کٹی ہے عمر حسینوں سے گفتگو کرتے

ہماری پھول کا ساغر اگر یہ گل بنتے

تو اور رنگ سے اظہار رنگ و بو کرتے

گراتے یوں ہی سر طور بجلیاں ہم پر

اگر حجاب تھا پردے سے گفتگو کرتے

یہ داغ مے ہیں بڑے پھیلتے ہیں سر دامن

جو آب زمزم و کوثر سے شست و شو کرتے

ہمیں خدا کے سوا کچھ نظر نہیں آتا

نکل گئے ہیں بہت دور جستجو کرتے

بقدر ظرف وضو مے جو ملتی پانی سے

سیاہ رو بھی دم حشر شست و شو کرتے

نہ تھا شباب کمر میں ریاضؔ زر ہوتا

تو دن بڑھاپے کے بھی نذر لکھنؤ کرتے