سمندر میں ندی نالے تو جا کر ڈوب جاتے ہیں

سمندر میں ندی نالے تو جا کر ڈوب جاتے ہیں

مگر شاعر کے کوزے میں سمندر ڈوب جاتے ہیں

ستم کی انتہا ہو تو ستم گر ڈوب جاتے ہیں

عصا کی زد میں آجائے تو لشکر ڈوب جاتے ہیں

حسد غیبت عداوت مصلحت مکاریاں دھوکے

ان عیبوں کے تلاطم میں سخنور ڈوب جاتے ہیں

زمانے بھر کی دولت کو وہ ٹھوکر مار دیتا ہے

خدا کے ذکر میں جب بھی قلندر ڈوب جاتے ہیں

اگر موجیں ڈبو دیتیں تو اس کا غم نہیں ہوتا

غم اس کا ہے کناروں پر جو آکر ڈوب جاتے ہیں