ساغر شراب عشق کا پی ہی لیا جو ہو سو ہو

ساغر شراب عشق کا پی ہی لیا جو ہو سو ہو

سر اب کٹے یا گھر لٹے فکر ہی کیا جو ہو سو ہو

عقل و خرد کو چھوڑ کر راہ جنوں پہ چل ذرا

دل اور جگر ہے چیز کیا سب کچھ لٹا جو ہو سو ہو

آگ لگی وہ عشق کی سر سے میں پاؤں تک جلا

فرط خوشی سے دل مرا کہنے لگا جو ہو سو ہو

کافر کہو یا اب مجھے دیوانہ چاہے جو کہو

تیرے خدا کو واعظا چھوڑ دیا جو ہو سو ہو

بندہ ہوں اک صنم کا میں کاوشؔ کسی سے کیا کہوں

مجھ میں سوا صنم کے اب کیا ہے بچا جو ہو سو ہو