سارے عالم میں تیری خوشبو ہے

سارے عالم میں تیری خوشبو ہے

اے میرے رشک گل کہاں تو ہے

ہو گیا دام خوف غم سے رہا

جو تمہارا اسیر گیسو ہے

مصحف روئے یار جانی پر

قابض افسوس خال ہندو ہے

نظم عالم کہ لا جواب لہ

فرو اس میں وہ بیت ابرو ہے

برچھی تھی وہ نگاہ دیکھو تو

لہو آنکھوں میں ہے کہ آنسو ہے

دل جو بے مدعا ہو کیا کہنا

یہی ویرانہ عالم ہو ہے

ایک دم میں ہزار دفتر طے

چشم حسرت غضب سخن گو ہے

تو ہی تو اور بال بال اپنا

فاختہ اور شور کوکو ہے

تجھ کو دیکھے پھر آپ میں رہ جائے

دل پر اتنا کس کو قابو ہے

جوش اشک و تصور قد یار

سرو گویا کھڑا لب جو ہے

حد نہ پوچھو ہماری وحشت کی

دل میں ہر داغ چشم آہو ہے

جس نے ایمان کر دیا کامل

وہ تمہارا ہی مصحف رو ہے

جس کے کشتے سے بھاگتی ہے موت

وہ تمہاری ہی تیغ ابرو ہے

پل بھی ہے فخر جونپور آسیؔ

خواب گاہ جناب شیخو ہے