نہ سکونِ قلب کی آرزو نہ دل و جگر کی تلاش ہے

نہ سکونِ قلب کی آرزو نہ دل و جگر کی تلاش ہے

تری جستجو میں جو کھو گئی مجھے اُس نظر کی تلاش ہے

جسے تو حرم میں نہ پا سکا مجھے اپنے دل میں وہ مل گیا

تجھے زاہد اس کا ملال کیا یہ نظر نظر کی تلاش ہے

ترے غم کو دل سے بھلا تو دوں مگر اِس خیال کاکیا کروں

کہ یہی متاعِ حیات ہے یہی عمر بھر کی تلاش ہے

نہ نگاہِ لطف کی ہے طلب نہ ترے کرم کی ہے آرزو

ترے نقشِ پا کی قسم مجھے تری رہ گذر کی تلاش ہے

تری منتظر ہے ہر اک نظر تجھے ڈھونڈھتے ہیں سبھی مگر

مرے سجدہ ہائے نیاز کو ترے سنگِ در کی تلاش ہے

یہ عنایتِ غمِ دوست ہے غمِ کشمکش جو دیا مجھے

کبھی اپنے دل کا خیال ہے کبھی اس نطر کی تلاش ہے

یہ جنوں نہیں ہے تو اور کیا کہ شبِ فراق میں اے صباؔ

مرا اضطراب جو چھین لے مجھے اس سحر کی تلاش ہے