جب کہیں چھڑ گئی داستانِ وفا جب کہیں ذکرِ دار و رسن آ گیا

جب کہیں چھڑ گئی داستانِ وفا جب کہیں ذکرِ دار و رسن آ گیا

حسنِ مغرور کا رنگ اڑنے لگا عشق میں اور بھی بانکپن آ گیا

آج محفل میں کچھ ایسے انداز سے جام لیکر وہ تو بہ شکن آ گیا

پارسائی پہ اپنی جنھیں ناز تھا اُن کو بھی میکشی کا چلن آ گیا

میرے دامن میں ہیں پھول بھی خار بھی اب کسی کو بھی مجھ سے شکایت نہیں

وسعتیں دینے والے تراشکریہ میرے دامن میں سارا چمن آ گیا

داغ دل کی قسم جب بھی تنہائی میں شام غم کے اندھیروں کی محفل سجی

جانے کیوں خود کوئی شعلہ رو دفعتاً شمع بن کر سرِ انجمن آ گیا

زلف لہرا گئی تو گھٹا چھا گئی آنکھ اٹھی تو فضا بھی بہکنے لگی

شوخ پھولوں کے چہرے اتر سے گیے جب چمن میں وہ گل پیرہن آ گیا

چاک اپنا گریباں کریں پھول کیوں اب چمن میں بہار آئے کس کے لیے

جب کہ اہلِ جنوں میں خرد آگئی عقل والوں میں دیوانہ پن آ گیا

اک زمانے کے بعد آکے دل میں مرے ان کی یاد اس طرح مطمئن ہو گئی

بعد مدت کے اپنے وطن میں صباؔ جیسے کوئی غریب الوطن آ گیا