دل کچھ اس طرح وقفِ الم ہو گیا

دل کچھ اس طرح وقفِ الم ہو گیا

مسکرانا بھی گویا ستم ہو گیا

ان کے جلوؤں سے دل کی مٹی تیرگی

دیر بھی رفتہ رفتہ حرم ہو گیا

وہ مرے سامنے آ گیے دفعتہً

اعتبارِ نظر اور کم ہو گیا

دل کی بیتابیاں اور بھی بڑھ گئیں

اتفاقاً جو اُن کا کرم ہو گیا

دولتِ دو جہاں میرے ہاتھ آگئی

جب میسر مجھے اُن کا غم ہو گیا

عشق نے مجھ کو بخشی ہیں یہ رفعتیں

چاند بھی میرا نقشِ قدم ہو گیا

میرا افسانۂ درد سن کر صباؔ

اک ستم گر کا دامن بھی نم ہو گیا