جہاں حسن کی گرم بازاریاں ہیں

جہاں حسن کی گرم بازاریاں ہیں

دل آزاریاں ہی دل آزاریاں ہیں

کبھی دشمنوں کی بھی غم خواریاں ہیں

محبت میں کیا کیا مزیداریاں ہیں

نہ پہلے سے وہ ہیں نہ ان کی طبیعت

وہی ہم وہی ناز برداریاں ہیں

یہ کچھ اور ہی آج ہے تیری محفل

یہ کچھ اور ہی آج تیاریاں ہیں

مرے آنسوؤں نے جلایا عدو کو

تماشا ہے پانی میں چنگاریاں ہیں

حکومت کے الفاظ لکھتے ہیں ہم کو

یہ نامے ہیں یا نیم سرکاریاں ہیں

صفیؔ اور دل دیں حسینوں کو توبہ

اجی سب یہ حضرت کی مکاریاں ہیں