وہی ہوتا ہے جو محبوب کو منظور ہوتا ہے

وہی ہوتا ہے جو محبوب کو منظور ہوتا ہے

محبت کرنے والا ہر طرح مجبور ہوتا ہے

تری فرقت میں کچھ تو ہو نہیں سکتا غریبوں سے

تڑپ لیتے ہیں ان کا جس قدر مقدور ہوتا ہے

کہیں جاتے ہیں تو اس کی گلی سے ہو کے جاتے ہیں

اگرچہ راستہ اس راستے سے دور ہوتا ہے

نہیں رکتے گھڑی بھر طالب دیدار کے آنسو

یہ ظالم شوق گویا آنکھ کا ناسور ہوتا ہے

بڑا احسان ہوگا میرے دل کا خون کر ڈالو

یہی مجبور کرتا ہے یہی مجبور ہوتا ہے

تجھے مشہور ہونا ہے تو جی بھر کر ستا مجھ کو

برائی سے بہت جلد آدمی مشہور ہوتا ہے

صفیؔ ہر دم تڑپنے کی بھلا طاقت کہاں مجھ میں

ذرا ان کو ستانا بھی کبھی منظور ہوتا ہے