یہی تیور یہی انداز ہیں تو سخت مشکل ہے

یہی تیور یہی انداز ہیں تو سخت مشکل ہے

تمہاری اک جوانی سینکڑوں کو آفت دل ہے

نہیں ہے دوستی مشکل مگر یہ سخت مشکل ہے

ہمارا دل ہمارا آپ کا دل آپ کا دل ہے

بگاڑا ہے مری جانب سے ایسا ان کو لوگوں نے

کہاں کی داد خواہی بات تک کرنی بھی مشکل ہے

یہ لیجے بندہ پرور آپ جیتے اور میں ہارا

یہ میرا دل نہیں بس ہو چکا یہ آپ کا دل ہے

تصور میں کسی کے انہماک اتنا بڑھا اپنا

مخاطب ہو گئے ہیں جس طرح کوئی مقابل ہے

تمنا کیا تمنا آرزو کیا آرزو میری

طبیعت ہے طبیعت آپ کی دل آپ کا دل ہے