جسے وہ کچھ بنانا چاہتا ہے

جسے وہ کچھ بنانا چاہتا ہے

تو پہلے دل دکھانا چاہتا ہے

وہ جب کچھ مسکرانا چاہتا ہے

ہر اک اپنی سنانا چاہتا ہے

بڑی اچھی سہی دنیا سے جنت

خوشی سے کون جانا چاہتا ہے

نہ پوچھو کیوں محبت کرنے والا

محبت کو چھپانا چاہتا ہے

کبھی وہ مہرباں ہو بھی تو سمجھو

کچھ اندازا لگانا چاہتا ہے

گھٹا سکتا نہیں کوئی بھی اس کو

خدا جس کو بڑھانا چاہتا ہے

یہ کیوں رہ رہ کے مسجد کا ارادہ

صفیؔ کس کو منانا چاہتا ہے