parastish se ziyaada naz-bardari gawahon ki

parastish se ziyāda nāz-bardārī gavāhoñ kī

gunahgāroñ kī ye tauhīn tauba hai gunāhoñ kī

use dekhā hai jis andāz se allāh shāhid hai

balā.eñ ḳhud mujhe lenī paḌīñ apnī nigāhoñ kī

ilāhī band muTThī kā bharam rakh le qiyāmat meñ

na khulvā dushmanoñ ke sāmne gaThḌī gunāhoñ kī

qiyāmat meñ sazā hī kā na rakho Dar gunah-gāro

tumheñ ḳhushiyāñ bhī us din dekhnī haiñ be-gunāhoñ kī

gunahgāroñ ke chehroñ par ye kaisā ḳhuun dauḌ aayā

tire jalve ne sūrat hī badal dī rūsiyāhoñ kī

itā.at karke dil qaabū meñ lā alla vāloñ kā

yahāñ chaltī nahīñ hai bādshāhī bādshāhoñ kī

manāo ḳhair apnī ho jahāñ jamghaT hasīnoñ kā

vahāñ sambhlo jahāñ chaltī hoñ talvāreñ nigāhoñ kī

mai-o-māshūq de jaate haiñ rañg apnā javānī meñ

mirī dānist meñ ik umr hotī hai gunāhoñ kī

'safī' hamdard bhī merī tarah āshiq tabī.at haiñ

jo sūrat mudda.ī kī hai vahī sūrat gavāhoñ kī

parastish se ziyaada naz-bardari gawahon ki

gunahgaron ki ye tauhin tauba hai gunahon ki

use dekha hai jis andaz se allah shahid hai

balaen KHud mujhe leni paDin apni nigahon ki

ilahi band muTThi ka bharam rakh le qiyamat mein

na khulwa dushmanon ke samne gaThDi gunahon ki

qiyamat mein saza hi ka na rakho Dar gunah-garo

tumhein KHushiyan bhi us din dekhni hain be-gunahon ki

gunahgaron ke chehron par ye kaisa KHun dauD aaya

tere jalwe ne surat hi badal di rusiyahon ki

itaat karke dil qabu mein la alla walon ka

yahan chalti nahin hai baadshahi baadshahon ki

manao KHair apni ho jahan jamghaT hasinon ka

wahan sambhlo jahan chalti hon talwaren nigahon ki

mai-o-mashuq de jate hain rang apna jawani mein

meri danist mein ek umr hoti hai gunahon ki

'safi' hamdard bhi meri tarah aashiq tabiat hain

jo surat muddai ki hai wahi surat gawahon ki