معشوق عجب چیز ہے دے جس کو خدا دے

معشوق عجب چیز ہے دے جس کو خدا دے

ہنستے کو رلا دے یہی روتے کو ہنسا دے

مشہور تو یہ ہے جسے جو چاہے خدا دے

ہم کس سے کہیں درد دیا ہے تو دوا دے

پھر مجھ کو ستانا مگر اے دیدۂ پر خوں

اس بزم میں بھی آج ذرا رنگ جما دے

یا موت مجھے آئے کہ یہ حال نہ دیکھوں

یا اے دل بیمار خدا تجھ کو شفا دے

تصویر وہ تصویر نظر جس پہ فدا ہو

آواز وہ آواز جو کانوں کو مزا دے

ہاں اپنے کرم پر تو بہت ناز ہے لیکن

تیرا ہی جو طالب ہو بتا پھر اسے کیا دے

تاثیر سخن کسب سے حاصل نہیں ہوتی

یہ دین خدا کی ہے صفیؔ جس کو خدا دے