jab tak nigah-e-shauq rahi iKHtiyar mein

jab tak nigāh-e-shauq rahī iḳhtiyār meñ

vo raat din rahe haiñ mere intizār meñ

chāleñ na.ī na.ī sī haiñ raftār-e-yār meñ

paḌ jā.egā ḳhalal ravish-e-rozgār meñ

rahnā hai chaar din chaman-e-rozgār meñ

do din ḳhizāñ meñ jā.eñge do din bahār meñ

jo ek rañg par ho ḳhizāñ-o-bahār meñ

vo phuul hī nahīñ chaman-e-rozgār meñ

saarī bahār us se hai fasl-e-bahār meñ

bas ek phuul hai chaman-e-rozgār meñ

dhoka huā ki hañste hue aa rahe haiñ aap

bijlī chamak ga.ī jo shab-e-intizār meñ

duniyā ko log chhoḌ ke uqbā pe kyuuñ mareñ

jo naqd meñ mazā hai kahāñ hai udhār meñ

haiñ vaqt ke ġhulām zamīñ aur āsmāñ

ye kyā sharīk hoñge mere kār-o-bār meñ

majbūr-e-bandagī meñ kahāñ shān-e-bandagī

rahne do kuchh na kuchh to mere iḳhtiyār meñ

piirī meñ hogā ġhaflat-e-yād-e-ḳhudā kā dard

ubhregī ye bhī choT lahū ke utaar meñ

ik taaza vārdāt hai ik taaza dam ke saath

mere irāde aa nahīñ sakte shumār meñ

koī na pūchhe ḳhair nakīrain hī sahī

parde kī baat jā ke kahūñgā mazār meñ

aao to is tarah mere mehmāñ rahā kaaro

ummīd jis tarah dil-e-ummīd-vār meñ

maiñ jabr-o-iḳhtiyār kī uljhan meñ paḌ gayā

kyā kah ga.e vo ik nigah-e-sharmsār meñ

apnī agar nahīñ hai to apnoñ kī fikr hai

har aadmī hai ek na ik ḳhalfashār meñ

naala ḳhilāf-e-va.ada kiyā haaye kyā kiyā

vo sun chuke to farq paḌā e'tibār meñ

kahte haiñ log maut se bad-tar hai intizār

merī tamām umr kaTī intizār meñ

majnūñ agar nahīñ na sahī kohkan to ban

itnā to ho ki maut rahe iḳhtiyār meñ

vo ḳhuun hī hamārī ragoñ meñ nahīñ rahā

dīvāngī kā ḳhauf ho jis se bahār meñ

sau mehrbāniyoñ ke evaz muskurā diyā

sarkār ne kamāl kiyā iḳhtisār meñ

aise ki intizār kī ghaḌiyāñ na pūchhiye

jis kā koī sharīk na huā intizār meñ

paidā kaaro kisī bhī tarah dil pe iḳhtiyār

dil iḳhtiyār meñ hai to sab iḳhtiyār meñ

kyuuñ nā-ummīd aap kā umīd-vār ho

sab kuchh hai kyā nahīñ nigah-e-sharmsār meñ

yā maut aa.egī mujhe yā niiñd aa.egī

ik aur shab guzār to duuñ intizār meñ

ishq aur aap vaah 'Safī' vaah vaah vaah

ġham aur hā-e-zindagī musta.ār meñ

jab tak nigah-e-shauq rahi iKHtiyar mein

wo raat din rahe hain mere intizar mein

chaalen nai nai si hain raftar-e-yar mein

paD jaega KHalal rawish-e-rozgar mein

rahna hai chaar din chaman-e-rozgar mein

do din KHizan mein jaenge do din bahaar mein

jo ek rang par ho KHizan-o-bahaar mein

wo phul hi nahin chaman-e-rozgar mein

sari bahaar us se hai fasl-e-bahaar mein

bas ek phul hai chaman-e-rozgar mein

dhoka hua ki hanste hue aa rahe hain aap

bijli chamak gai jo shab-e-intizar mein

duniya ko log chhoD ke uqba pe kyun maren

jo naqd mein maza hai kahan hai udhaar mein

hain waqt ke ghulam zamin aur aasman

ye kya sharik honge mere kar-o-bar mein

majbur-e-bandagi mein kahan shan-e-bandagi

rahne do kuchh na kuchh to mere iKHtiyar mein

piri mein hoga ghaflat-e-yaad-e-KHuda ka dard

ubhregi ye bhi choT lahu ke utar mein

ek taza wardat hai ek taza dam ke sath

mere irade aa nahin sakte shumar mein

koi na puchhe KHair nakirain hi sahi

parde ki baat ja ke kahunga mazar mein

aao to is tarah mere mehman raha karo

ummid jis tarah dil-e-ummid-war mein

main jabr-o-iKHtiyar ki uljhan mein paD gaya

kya kah gae wo ek nigah-e-sharmsar mein

apni agar nahin hai to apnon ki fikr hai

har aadmi hai ek na ek KHalfashaar mein

nala KHilaf-e-wada kiya haye kya kiya

wo sun chuke to farq paDa e'tibar mein

kahte hain log maut se bad-tar hai intizar

meri tamam umr kaTi intizar mein

majnun agar nahin na sahi kohkan to ban

itna to ho ki maut rahe iKHtiyar mein

wo KHun hi hamari ragon mein nahin raha

diwangi ka KHauf ho jis se bahaar mein

sau mehrbaniyon ke ewaz muskura diya

sarkar ne kamal kiya iKHtisar mein

aise ki intizar ki ghaDiyan na pūchhiye

jis ka koi sharik na hua intizar mein

paida karo kisi bhi tarah dil pe iKHtiyar

dil iKHtiyar mein hai to sab iKHtiyar mein

kyun na-ummid aap ka umid-war ho

sab kuchh hai kya nahin nigah-e-sharmsar mein

ya maut aaegi mujhe ya nind aaegi

ek aur shab guzar to dun intizar mein

ishq aur aap wah 'Safi' wah wah wah

gham aur ha-e-zindagi mustaar mein