کیا کرشمے تھے ترے دیدار میں

کیا کرشمے تھے ترے دیدار میں

ہم تماشہ بن گئے بازار میں

دل نے کیا دیکھا نگاہ یار میں

رنج کی باتیں بھی کہہ دیں پیار میں

ہائے اب سمجھے تو کیا سمجھے کوئی

لاکھ پہلو ہیں ترے اقرار میں

اے دل اپنے دیکھنے والوں کو دیکھ

کیا ادھر ہے روزن دیوار میں

آپ روٹھے ہیں تو ہم بھی ہیں خفا

قول میں وہ تھا نہ یہ اقرار میں

دوست دشمن ہو کہ اپنا ہو کہ غیر

ایک ہیں سب آپ کی سرکار میں

عاشقی سے کر لے توبہ اے صفیؔ

حسن اب بکنے لگا بازار میں