جب خدا سے لو لگائی جائے گی

جب خدا سے لو لگائی جائے گی

پھر دعا کب کوئی خالی جائے گی

تاکتے ہیں دل وہ میرا بار بار

کیا کوئی حسرت نکالی جائے گی

آنکھ ملتے ہی کسی معشوق سے

پھر طبیعت کیا سنبھالی جائے گی

گر کبھی چمکے گی وہ برق جمال

آنکھ پھر کب اس پہ ڈالی جائے گی

ہائے کب ہوگا انہیں میرا خیال

آہ بیکس کی نہ خالی جائے گی

چھوڑیئے اب شرم یہ فرمائیے

حسرت دل کی کب نکالی جائے گی

سونچ کر یہ ان کو چھیڑا ہم نے آج

منہ سے ان کے کچھ دعا لی جائے گی

کم سنی کی ضد جوانی میں بھی ہے

این کی کب یہ خوردسالی جائے گی

سخت جاں سنجرؔ ہوا ہے عشق میں

تیغ اب قاتل کی خالی جائے گی