یہ دنیائے فانی ہے آنی جانی سنبھل کے چلیے قدم قدم پر

یہ دنیائے فانی ہے آنی جانی سنبھل کے چلیے قدم قدم پر

کہ مفت جائے نہ زندگانی سنبھل کے چلئے قدم قدم پر

نہ کیجے برباد نوجوانی کہ دو ہی دن کی ہے زندگانی

خدا کی صورت یہ ہے دکھانی سنبھل کے چلیے قدم قدم پر

جو مانگنا ہو خدا سے مانگو اسی سے بخشش کی التجا ہو

گناہ ڈھل کر ہو پانی پانی سنبھل کے چلیے قدم قدم پر

گرے جو بے ہوش ہو کے موسیٰ تو مسکرا کر وہ شوخ بولا

کہاں گئی وہ لن ترانی سنبھل کے چلیے قدم قدم پر

تمہیں نگاہوں میں ہو سمائے تمہیں ہو عالم سے منہ چھپائے

نہیں ہے کوئی تمہارا ثانی سنبھل کے چلیے قدم قدم پر

بتوں سے الفت جو کر رہے ہو حسینوں پر دل سے مر رہے ہو

نہ ٹوٹے غم تم پہ آسمانی سنبھل کے چلیے قدم قدم پر

نہیں ہے دنیا میں تم کو رہنا لحد میں سنجرؔ پڑے گا سونا

سمجھ کے اس کو سرائے فانی سنبھل کے چلیے قدم قدم پر