جو حسیں آیا نظر دلبر ہمارا ہو گیا

جو حسیں آیا نظر دلبر ہمارا ہو گیا

دل کا پیارا ہو گیا آنکھوں کا تارا ہو گیا

ہائے اس انداز سے ظالم نے مارا تیر ناز

دل ہوا ٹکڑے جگر بھی پارا پارا ہو گیا

بعد مدت پھر مری تقدیر جاگی شکر ہے

کوچۂ جاناں میں اب اپنا گزارا ہو گیا

تنگ آئے ہیں دل وحشت سے اب ہم کیا کریں

آہ یہ کمبخت کیوں دشمن ہمارا ہو گیا

غیر منہ تکتا رہا میں عرض مطلب کر چکا

مجھ سے ان سے آنکھوں آنکھوں میں اشارہ ہو گیا

رک گئے آنسو مرے درد جگر کچھ کم ہوا

اس بت سیمیں بدن کا جب نظارہ ہو گیا

دل بھی تم کو دے چکا قربان جاں بھی کر چکا

اب تو یہ باور کرو سنجرؔ تمہارا ہو گیا