لگادے آگ شمعِ طور میرے خانۂ تن میں

لگادے آگ شمعِ طور میرے خانۂ تن میں

رہے گی تابکے روپوش تو وادیٔ ایمن میں

مشامِ جان کو تازہ کریں گے حضرتِ موسیٰ

شمیم جانفزا پھیلی ہوئی ہے دشتِ ایمن میں

چمن میں جھومتا شاید وہ مستِ ناز آتا ہے

کہ نرگس محوِ حیرت ہورہی ہے صحنِ گلشن میں

مرا داغِ جگر گلدستہ ہے باغ محبت کا

اسی کو دیکھ کیا پائے گا جاکر صحنِ گلشن میں

شبِ تاریک ہجراں سے نہ ڈرنا اے دلِ غمگین

کہ نورِ سحر پنہاں ہے اسی ظلمت کے دامن میں

وفورِ جہد سے جب دل کو آئینہ بنا ڈالا

تو بے پردہ نظر آیا وہ میرے خانۂ تن میں

جو آنکھوں میں نہیں آتے تو اے جانِ جہاں سن لو

مرا دل عرشِ منزل ہے رہو تم اپنے مسکن میں

جدا ہوتے ہی سرتن سے پڑا ہے تفرقہ کیسا

جناں میں روح سر نیزہ پہ تن ہے گنج مدفن میں

چمن میں بھی دلِ بریاں مرا سرگرمِ نالہ ہے

خدا جانے یہ گلشن ہے کہ میں بیٹھا ہوں گلخن میں

جوابِ نامہ کے بدلے کفن میں اے مہِ خوبی

تری تصویر لے جائے گا نشترؔ گُنج مدفن میں

نہیں راحت میسر دو گھڑی بھی درد سے دل کے

تڑپتے لوٹتے رہتے ہیں ہم کو چہ میں قاتل کے

کلیجہ دونوں ہاتھوں سے سنبھالیں ظلم کے بانی

نکلنے کیلئے بیتاب ہیں نالے مرے دل کے

مرا خط خود بخود اڑ کر کسی کے ہاتھ میں پہنچا

جو فقرے خط میں لکھے تھے مری بیتابیٔ دل کے

ہے جلوہ شاہدِ مقصود کا موجود اس گھر میں

اٹھا کر دیکھ لو پردے حریمِ کعبۂ دل کے

مٹاتے ہیں جو تیری راہ میں نام ونشاں اپنا

انہیں کو کچھ نشاں ملتے ہیں یارب تیری منزل کے

چمک دردِ دل بیتاب کی بڑھ جاتی ہے نشترؔ

شبِ فرقت تصور میں دُرِ دندانِ قاتل کے