خزاں نصیبوں کی قسمت میں کیا بہار آئے

خزاں نصیبوں کی قسمت میں کیا بہار آئے

کہ پھول اٹھائیں تو دامن میں ان کے خار آئے

ترے سوا جو کسی گل پہ مجھ کو پیار آئے

نہال عشق ووفا میں نہ برگ وبار آئے

شبِ فراق کی بے چینیاں معاذ اللہ

جو موت آتی ہے یارب تو ایک بارآئے

دل فسردہ نے کچھ ایسا بے نیاز کیا

کہ اب خزاں کا رہے دور یا بہار آئے

الٰہی پھر مجھے توفیق جیب وداماں کی

وہ مجھ سے پوچھتے ہیں کہئیے پھر بہار آئے

کچھ اور ہی مری تقدیر میں ہے ورنہ سراؔج

وہ آئیں اور نہ دل کو مرے قرارآئے