ہم نشیں پوچھ نہ ہم نے اسے کیا دیکھا ہے

ہم نشیں پوچھ نہ ہم نے اسے کیا دیکھا ہے

شعلہ فانوس کے پردے میں چھپا دیکھا ہے

اے گل ولالہ کی رنگیں نقابوں والے

پردے پردے میں تجھے جلوہ نما دیکھا ہے

اللہ اللہ ترے کوچے کے ذروں کا وقار

ہم نے کعبہ کو یہیں ناصیہ فرسا دیکھا ہے

ہر چٹکتے ہوئے غنچے کی زباں پر ہے تو

ہر عنادل کو ترا حمد سرا دیکھا ہے

ہر جفا پر جو کرے شکر کے سجدے صدقے

تم نے ایسا بھی گنہگار وفا دیکھا ہے

مردے جی اٹھتے ہیں قبروں میں تری ٹھوکر سے

خاک پا میں اثر آب بقا دیکھا ہے

کیوں سراجؔ اس کے کرم کا نہ سہارا رکھوں

جو سنا میں نے کہیں اس سے سوا دیکھا ہے