اکبر کا پتہ کچھ نہیں ملتا وہ کہاں ہے

اکبر کا پتہ کچھ نہیں ملتا وہ کہاں ہے

عاشق ہوا جس روز سے بے نام و نشاں ہے

اللہ ہی کنارے سے لگائے تو لگائے

کشتی مری دریائے محبت میں رواں ہے

کھینچا ہمیں جب خاک لحد نے تو یہ سمجھے

وہ گھر تو کرائے کا تھا اپنا یہ مکاں ہے

تربت مرے استاد کی پھولوں سے بھری رکھ

اے بار خدا تو چمن آرائے جہاں ہے

سنتے ہیں غزل پڑھنے کو اکبرؔ بھی ہے آیا

جو اس سے ہو واقف ہمیں بتلا دے کہاں ہے