سرسری بھی ہے کارگر بھی ہے

سرسری بھی ہے کارگر بھی ہے

یہ کٹاری بھی ہے نظر بھی ہے

کسے تاکا کسے کیا بسمل

او کماندار کچھ خبر بھی ہے

کون کہتا ہے گل نہیں سنتے

آہ بلبل میں کچھ اثر بھی ہے

گو مری داستاں ہے طول بہت

تم سنو تو یہ مختصر بھی ہے

مجمع البرزخین ہے انسان

یہ فرشتہ بھی ہے بشر بھی ہے

نظر ہے جو پسند آئے تمہیں

دل بھی موجود ہے جگر بھی ہے

وار تیری نگہ کا روکے کون

کہیں اس تیغ کی سپر بھی ہے

یہ بھی خدمت میں سر بلند رہے

آئینہ دار اک قمر بھی ہے

ان کے وعدوں کا کچھ یقین نہیں

گفتگو میں اگر مگر بھی ہے

غیر نے تیغ پر گلا نہ دھرا

کوئی میرا سا بے جگر بھی ہے

اٹھو اکبرؔ چلو مدینے کو

اس سے بہتر کوئی سفر بھی ہے