جستجو جس کی ہو اُس شے کا پتا ملتا ہے

جستجو جس کی ہو اس شے کا پتا ملتا ہے

ہے مثل سچ کہ جو ڈھونڈھے تو خدا ملتا ہے

خضر بھی آئیں تو کھو جائیں رہ الفت میں

کوچۂ عشق کی راہوں کا پتا ملتا ہے

تنگیٔ رزق کی نا حق ہے شکایت اے دل

ہے جو کچھ اپنے مقدر کا لکھا ملتا ہے

ہے تلاش اس کی جو اے دل تو فقیروں میں دیکھ

صورتوں میں انہیں لوگوں کی خدا ملتا ہے

شیخ کعبے کو چلا ہے تو برہمن سوئے دیر

دیکھنا تو ہے کسے اس کا پتا ملتا ہے

خانہ بربادی عشاق سے کیا ہاتھ آیا

ظلم سے ان ستم ایجادوں کو کیا ملتا ہے

کم ہے مجھ سا بھی صحیح النسب اکبرؔ کوئی

سلسلہ اپنا کسی زلف سے جا ملتا ہے