آنکھیں دیکھیں نہیں تم نے کسی مستانے کی

آنکھیں دیکھیں نہیں تم نے کسی مستانے کی

واعظو قدر ہو کیوں کر تمہیں پیمانے کی

وحشتیں بڑھ گئیں پھر آپ کے دیوانے کی

اس پہ کیا گزری جو دھن بندھ گئی ویرانے کی

قیس رکھے قدم اس میں تو جگر پانی ہو

قاف کی چوٹی ہے پستی مرے ویرانے کی

واعظ آ جائیں ابھی بادۂ اطہر کے مزے

تجھے لگ جائے ہوا گر میرے مے خانے کی

شمع مینا کا ہوا شمع حرم پر دھوکا

لو لگی ہے مجھے کعبے میں بھی بت خانے کی

اس کا سایہ پڑا تو زاہد بہک جاؤ گے

دور دور آؤ یہ دیوار ہے مے خانے کی

بزم آراستہ موجود ہے مے حاضر جام

اے حسیں دیر اگر ہے تو ترے آنے کی

بلبلیں چہچہے کرتی ہیں چمن میں اکبرؔ

ہے خبر آج گلستاں میں بہار آنے کی