ہم ساتھ لیتے آئے ہیں تصویر یار کو

ہم ساتھ لیتے آئے ہیں تصویر یار کو

کیوں کر کہیں نہ خلوت جاناں مزار کو

یہ مشت خاک بعد فنا حد سے بڑھ گئی

کہتے ہیں لوگ ڈھیر ہمارے مزار کو

بیگانہ بن کر آئے ہیں وہ فاتحہ کو بھی

واقف ہیں اور پوچھ رہے ہیں مزار کو

روتا ہے یہ تو ہنستی ہے بالکل زمین باغ

گریہ خوشی کا آتا ہے ابر بہار کو

اللہ رے ترے زلف کے سودائی کا دماغ

خون سیاہ کہتا ہے مشک تتار کو

اکبرؔ تمہارے در پہ ہے بیٹھا ڈھئی دئے

مایوس کیجیے نہ اس امیدوار کو