جس کو دیکھو ہے وہی محو تماشہ تیرا

جس کو دیکھو ہے وہی محو تماشہ تیرا

شان اللہ کی ہے چہرۂ زیبا تیرا

عکس ہر آئینہ میں تیرا ہے تو ہے وہ جمیل

ہر جمال اور ہر انداز ہے جلوہ تیرا

طور پر آگ لگی ہو گئے موسیٰ بے خود

کیسی نیرنگیاں دکھلا گیا جلوہ تیرا

مار ڈالے گی مجھے تیری محبت کی نظر

اس کے ہی ہاتھ ہے اب فیصلہ میرا تیرا

تیری بخشی ہوئی بیکار رہیں گی آنکھیں

دیکھ ہی لے گا تجھے عاشق شیدا تیرا

میرے مولیٰ مرے مالک مرے پیارے اللہ

کیا کہوں اس کے سوا میں کہ ہوں بندہ تیرا

اپنے اکبرؔ کو بنا دے مرے خالق ایسا

سچے دل سے وہ ہمیشہ رہے بندہ تیرا