کیا روکنا آسان ہے اس تیغ ادا کا

کیا روکنا آسان ہے اس تیغ ادا کا

ایسا ہے کوئی تھام لے جو ہاتھ قضا کا

ہم اہل وفا رنگ دکھاتے ہیں وفا کا

دل کھول کے دکھلائیے ڈھنگ اپنی جفا کا

جاتا ہی نہیں دل سے مزا تیری جفا کا

ہم اہل وفا بھول گئے نام وفا کا

شہرا ہے بہت عاشق شیدا کی وفا کا

پہلو یہ دبائے ہوئے تیری جفا کا

اے جان جو نسبت ہوئی تیری طرف اس کی

جھکتا ہوا پلہ ہے وفا سے بھی جفا کا

ناز اہل وفا کو جو وفا پر ہے بجا ہے

پجنے لگا وہ جس نے لیا نام وفا کا

حل ہوتی ہے مشکل تو بلا ٹلتی ہے سر سے

کیا نام مبارک ہے شہیدان وفا کا

تا حشر یہی صفحۂ ہستی پہ رہے گا

مٹ جائیں گے ہم نام مٹے گا نہ وفا کا

دنیا سے وفادار تو اٹھے ہی تھے اکبرؔ

اب نام بھی اٹھتا نظر آتا ہے وفا کا