محبت نے تری مجھ کو کیا اپنوں سے بیگانہ

محبت نے تری مجھ کو کیا اپنوں سے بیگانہ

تعلق سب کا چھوٹا ہو گیا میں تیرا دیوانہ

جسے الفت میں پاس آبرو ہے ہے وہ دیوانہ

یہاں جو دور ہے فرزانگی سے ہے وہ فرزانہ

ہوا ہوں جب سے اے جان جہاں میں تیرا دیوانہ

مرا نام اہل دانش کی زبانوں پر ہے فرزانہ

شراب ایسی پلا مجھ کو نہ بہکوں میں نہ لغزش ہو

کہے ہر دیکھنے والا کہ یہ ہے اس کا مستانہ

جہاں پہنچی نظر میری خدایا تو نظر آیا

مری آنکھوں میں سب دنیا ہے تیرا آئینہ

مرے قاتل نے مقتل میں مجھی کو چن لیا اکبرؔ

زمیں پر سر گرا میرا ادا کرنے کو شکرانہ