یارب کہیں کہے بھی قیامت پکار کے

یارب کہیں کہے بھی قیامت پکار کے

میں آئی سونے والے اٹھیں اب مزار کے

رکھے جو میری قبر پر اس رشک گل نے پاؤں

غنچے شگفتہ ہو گئے لوح مزار کے

دیکھا کسے فرشتوں نے آتے ہوئے ادھر

چکر لگا رہے ہیں ہمارے مزار کے

وہ کج کلاہ آئے جو دریا کی سیر کو

رکھ دیں حباب ٹوپیاں سر سے اتار کے

اس سے چمن چھٹا تو وطن ہم سے چھٹ گیا

ہم بھی ہیں ساتھ ساتھ ہی فصل بہار کے

اکبرؔ ابھی نہ بند ہوں یہ نغمہ سنجیاں

گلشن میں ہیں بلند ترانے ہزار کے