تم آئے باغ باغ یہ ویرانہ ہو گیا

تم آئے باغ باغ یہ ویرانہ ہو گیا

وحشت کدہ ہمارا پری خانہ ہو گیا

فیض قدم سے تیرے ہوا کعبہ محترم

برسوں کا بت کدہ تھا خدا خانہ ہو گیا

اس بت نے آ کے قبضہ مرے دل پہ کر لیا

پروردگار گھر ترا بت خانہ ہو گیا

بے ہوش کر دیا مجھے اس بت کے عشق نے

اللہ تیرا شکر میں فرزانہ ہو گیا

ہم مے کشوں کا منہ نہیں پھرتا ادھر سے کیوں

قبلہ ہمارا کیا در مے خانہ ہو گیا

سب کھیل ہی بگڑ گیا اکبرؔ نے توبہ کی

لو ختم اب یہ جلسۂ رندانہ ہو گیا