درد دل کا ماجرا کس سے کہیں

درد دل کا ماجرا کس سے کہیں

کون ہے درد آشنا کس سے کہیں

درد کی صورت اٹھا پہلو سے وہ

ہائے دل میں درد اٹھا کس سے کہیں

مار ڈالا انتظار یار نے

آنکھوں میں دم آ گیا کس سے کہیں

آپ نے جو کچھ کہا ہم نے سنا

اپنی بیتی ہم بھلا کس سے کہیں

عشق اک پردہ نشیں کا ہے ہمیں

اپنا قصہ برملا کس سے کہیں

ان کا منہ پائیں تو کچھ ہم کہہ چلیں

وہ تو ہیں ہم سے خفا کس سے کہیں

آ گئے ہیں ہم بلا کے پیچ میں

کیا ہے وہ زلف دوتا کس سے کہیں

آ گیا اک سنگ دل پر اپنا دل

شیشہ پتھر سے لڑا کس سے کہیں

وہ تو سنتے ہی نہیں عاشق کا حال

جو ستم ہم پر ہوا کس سے کہیں

جلوہ فرما دل میں اے اکبرؔ ہے کون

بات پردے کی بھلا کس سے کہیں