کیا جانے کدھر ہم ہیں وہ دل دار کہاں ہے

کیا جانے کدھر ہم ہیں وہ دل دار کہاں ہے

وہ اکبر خستہ جگر افگار کہاں ہے

بت خانے کسے کہتے ہیں کیا چیز ہے کعبہ

تسبیح کدھر رہتی ہے زنار کہاں ہے

کس طرح سے آنا ہوا مے خانہ میں اے شیخ

جبہ ہے کہاں آپ کی دستار کہاں ہے

اللہ رے اس امت مرحوم کے رتبے

خود عفو ہے جو یاں کہ گنہ گار کہاں ہے

جز تیرے کسی کی ہمیں اے دوست خبر کیا

کیا جانیں کدھر غیر گئے یار کہاں ہے

پیدا جو ہو سچی طلب انسان کو اکبرؔ

مطلوب کہے میرا طلب گار کہاں ہے