گلشن میں اس نے رخ سے جو پردہ اٹھا دیا

گلشن میں اس نے رخ سے جو پردہ اٹھا دیا

بلبل کا ہوش رنگ گلوں کا اڑا دیا

یہ کہہ کے شیخ نے مجھے درس فنا دیا

باقی رہا وہ جس نے خودی کو مٹا دیا

تھا اپنی صنعتوں کا تماشہ جو دیکھنا

بازار کائنات میں میلا لگا دیا

رزاقیٔ خدا پہ ہے تکیہ فقیر کو

بیٹھے ہیں گھر میں کھاتے ہیں اللہ کا دیا

دل کس سے مانگتے ہو کہاں دل کہاں جگر

مدت ہوئی کہ خاک میں سب کو ملا دیا

اکبرؔ بلند کی مرے قاتل نے تیغ جب

میں نے سر نیاز قدم پر جھکا دیا