وعدۂ فردا بہت کرتے تھے مجھ مضطر سے آپ

وعدۂ فردا بہت کرتے تھے مجھ مضطر سے آپ

اب کہاں جائیں گے چھپ کر عرصۂ محشر سے آپ

ہے کہاں تک جلوۂ خورشید دنیا دیکھ لے

اک ذرا پردہ ہٹا دیں چہرۂ انور سے آپ

جان میں جان آئے گی کچھ دیر تو ٹھہرے گا دل

جھوٹ سچ آنے کا وعدہ کر تو دیں مضطر سے آپ

میرا دل ہے نرم و نازک آپ کا دل سخت تر

آبگینہ کو ملاتے ہیں کہاں پتھر سے آپ

شاہؔ کی یہ عرض ہے اے شافع روز جزا

حشر کے دن بخشوا دیں، داورِ محشر سے آپ