گھر سے باہر آرہی ہے تاب روئے یار کی

گھر سے باہر آرہی ہے تاب روئے یار کی

واہ کیا تقدیر چمکی روزنِ دیوار کی

زرد چہرہ آنکھ پتھرائی زباں اور ہونٹ خشک

اے مسیحا اب یہ حالت ہے ترے بیمار کی

اس کی نظروں میں سمائے پھر نہ ساون کی جھڑی

دیکھ لے بارش جو میری چشم دریا بار کی

ہے تشابہ کا تعلق ان کے دنداں سے اسے

اس لئے ہے قدر اتنی گوہرِ شہوار کی

چشمِ و ابرو دیکھ کر ان کے تعجب ہے مجھے

کیا ضرورت ہے گلِ نرگس پہ اک تلوار کی

جس کو دے رکھا ہے خورشیدِ قیامت کا خطاب

ایک چنگاری ہے میری آہ آتش بار کی

کیا ہنسی آتی ہے اے گل جو نہیں خود اہلِ فن

اہل فن سے چاہتے ہیں داد وہ اشعار کی