ساغر توحید دے اے ساقی سرشار سرخ

ساغر توحید دے اے ساقی سرشار سرخ

جس سے دل پرنور ہو اور آنکھیں ہوں یکبار سرخ

ہیں گل رخسار تیرے غیرت گلزار سرخ

نرگسی آنکھیں ہیں تیری اے گل بیخار سرخ

رند میکش سرخرو دکھلائی دیں تجھ کو نہ کیوں

تیری آنکھوں میں ہی ڈورے ساقی خمار سرخ

ایسے ایسے داغ سوزاں میرے اس سینہ میں ہیں

جن سے میرا جسم بھی ہے مثل لالہ زار سرخ

خود بنا نور تجلی موسیٔ عمراں بھی خود

خود ہوا وہ طور سینا خود ہوا وہ نار سرخ

روئے احمد کی تجلیٔ جلالی سے تمام

دیکھتا ہوں میں کہ ہے ہر کوچۂ و بازار سرخ

سچ بتا ادریسؔ کیوں ہیں سرخ یہ آنکھیں تیری

نشہ سے کس مئے کے ہے یہ روئے پُر انوار سرخ