اے آفتاب عالم ہر جا ہے نور تیرا

اے آفتاب عالم ہر جا ہے نور تیرا

ہر ذرہ میں چمکتا کیسا ہے نور تیرا

تو شمع ہے منور فانوس کے ہے اندر

محفل میں سارے لیکن پھیلا ہے نور تیرا

تو ہے چراغ روشن عالم میں جلوہ افگن

خلوت میں بزم میں بھی چھایا ہے نور تیرا

روشن ہیں تجھ سے اختر شمس و قمر ہیں انور

ہر شان میں منور کیا کیا ہے نور تیرا

پہونچے جو طور سینا موسیٰ ابن عمران

صورت میں نخل کے وان بولا ہے نور تیرا

کچھ بھی نہیں ہے عرفانؔ واللہ ثم باللہ

گر ہے حباب در ہے دریا ہے نور تیرا