کلیمِ طور پہ بے خود بنائے جاتے ہیں

کلیمِ طور پہ بے خود بنائے جاتے ہیں

حضور عرشِ بریں پر بلائے جاتے ہیں

خدا کا شکر کہ مقتل میں لائے جاتے ہیں

زہے نصیب کہ پھر آزمائے جاتے ہیں

ستائے جاتے ہیں چرخے لگائے جاتے ہیں

نیاز مند مگر ناز اٹھائے جاتے ہیں

نقوشِ مہر و وفا کیوں مٹائے جاتے ہیں

حضور کیوں مرے دل کو دکھائے جاتے ہیں

شبِ وصال کے نقشے جمائے جاتے ہیں

چراغ شام سے پہلے جلائے جاتے ہیں

ہم اپنی آنکھوں سے ان کو جدا نہیں کرتے

مگر وہ ہم کو نظر سے گرائے جاتے ہیں

بتوں کا عشق، محبت کی اک کہانی ہے

کوئی سنے نہ سنے ہم سنائے جاتے ہیں

ہمارا قصۂ غم دل سے وہ نہیں سنتے

ہم اپنی رام کہانی سنائے جاتے ہیں

یہ دلگی بھی، محبت کی چھیڑ چھاڑ بھی ہے

وہ آزماتے ہیں ہم آزمائے جاتے ہیں

ہماری آس کو وہ ٹوٹنے نہیں دیتے

بگڑتی جاتی ہے لیکن بنائے جاتے ہیں

وہ میرے پہلو سے اٹھنے لگے جو وقتِ سحر

تڑپ تڑپ کے کہا دل نے، ہائے جاتے ہیں

مزے کی بات تو یہ ہے کہ اپنے محسنؔ کو

وہ اپنا بندۂ احساں بنائے جاتے ہیں