مری آہ جگر سے کیوں نہ ہووے اب اثر پیدا

مری آہ جگر سے کیوں نہ ہووے اب اثر پیدا

وہیں تو شیر رہتا ہے جہاں ہوتا ہے سر پیدا

تمنا عشق کی رکھنا غلط فہمی ہے پیری میں

کہیں افسردہ خاکستر سے ہوتا ہے شرر پیدا

رگ جاں کے تئیں مجنوں کی کیا فصاد پہچانے

مژہ سے چشم لیلیٰ کے ہے اس کو نیشتر پیدا

تعین سے نکل اس بیضۂ افلاک کے اے دل

تہیہ عرش پر اڑنے کا ہے کر بال و پر پیدا

خدا حافظ ہے بحر عشق میں اس دل کی کشتی کا

کہ ہے چین جبین یار سے موج دگر پیدا

گدا کو کیوں نہ سیاحی کی لذت ہو کہ ہوتا ہے

نیا دانہ نیا پانی نیا اک اور گھر پیدا

یہاں تک خاک کا رتبہ ہے اس عالم میں اب جس سے

کیا ہے شیشۂ ساعت نے اسباب سفر پیدا

دھرا ہے اشک کس کی چشم میں جز دیدۂ عاشق

نہیں دیکھا ہے یہ ہر اک صدف سے ہو گہر پیدا

فقط کچھ طور پر جلوہ نہ تھا آئینے میں بھی ہے

نصیرؔ اس کی تجلی ہے بہ آئین دگر پیدا