جب بر در دل حضرت عشق آن پکارے

جب بر در دل حضرت عشق آن پکارے

گوشہ ہوئی عقل اور ہوئے اوسان کنارے

بازی وہی لے جائے گا اس کھیل میں اے دل

جو پہلے کٹا مہرہ جان اپنی کو ہارے

گر حسن میں ہمسر ہیں تمہارے مہ و خورشید

دن رات یہ کیوں ہوتے ہیں قربان تمہارے

جو سلسلۂ زلف کے ہیں دست گرفتہ

پھرتے ہیں سراسیمہ پریشان بے چارے

پل مارے تو ڈوبے ہے ابھی زورق گردوں

طوفاں پہ ہیں یہ دیدۂ گریان ہمارے

گر رستم و سہراب ہیں ایسے ہی دلاور

ہوویں تو بھلا عشق کے میداں میں اتارے

کل دورہ مجنوں تھا نیازؔ آج ہے اپنا

نوبت کے بجے بر سر دوران نقارے